ⵜⴰⵎⵙⵎⵓⵏⵜ ⴰⴷ ⵏⵓⵔⵓ “tamesmunt “Ad Nuru i Yimyura s Tmaziɣt” Omar AIT SAID

“Afus ur itturun aḍar ag amun”, ad nnan imezwura-nneɣ. Maca yan ittaran, is nit ran ad recmen ili d twengimt-nnsen, ad umun g umezruy.

Atig n tirra d wuddur-nnes ad d-yiwin allig d-tlula tmesmunt “Ad Nuru i Yimyura s Tmaziɣt” g usegg°as n 2971-2021 g teɣremt n Murakuc. Sbeddan-tt idsn imazzalen, seg tugt n temnaḍin n tmazirt, iran afella i tutlayt d tirra d udlis d tsekla d tussna tamaziɣt.

Tamesmunt “Ad Nuru i Yimyura s Tmaziɣt”, da tettaws imaraten d tmaratin g wufuɣ n idlisen s tutlayt tamaziɣt d idlisen isawalen ɣef tussna d tsekla tamaziɣt.

Tefka “Ad Nuru i Yimyura s Tmaziɣt” yan wuddur axatar i imaraten d tmaratin ittaran s tutlayt tamaziɣt. Idlisen imezwura nna d-tessufɣ gan yan wanaw ismutturen ayda-nneɣ amiwan seg tullisin tiqburin, maca idlisen aḍnin nna d-tessufuɣ tmesmunt-a gan asneflul g yigran yaḍnin n tsekla zund tamedyazt, ungal d usuɣl n tsekla tamaḍlant ɣer tmaziɣt…

Usin inebdaden imeqqranen n tmesmunt “Ad Nuru i Yimyura s tmaziɣt” tamassayt mar ad yali wawal d watig n tsekla tamaziɣt g usammer ula akk° tisgg°in n Umur-N-Wakuc s afella, imkenna llant tsentayin aḍnin g tsegg°in akk° n tmurt-nneɣ, zund “tazlɣa n tirra” illan g tsega n Unẓul Utrim. Timesmunin-ad, gant akk° isutar ixataren i udlis amaziɣ mar ad ilkem aswir nna as-nessirim.

Inebdadn n tmesmunt “Ad Nuru” da ttnaɣen awd s imassen d isura itiknulujiyn g yigr n umsawaḍ amuṭṭun zund « afaysbuk » d « yutub », da dig-sen ttmraran awal, fken dig-sen isisfiwen ɣef idlisen imaynuten nna d-tessufuɣ ula willi d-ffeɣnin g tsegg°in yaḍnin, awettas-nnsen ad sslekmen tibratin d imaynuten isklanen i imɣran d ugdud akk° s umata.

G tsega aḍnin, tefrek tmesmunt “Ad Nuru” s watig ameqqran illan ɣur ufran aseklan, ayennaɣ as da ɣif-s tsenmala imraraten n wawal g tdabutin-nnes. Acku tirra tar afran aseklan zund yan useklu (addag) war aman ! Afran aseklan ad igan asafar n tirra, netta ad asent-yakkan tazedgi d yiman ad ddrent. Afran aseklan ad yakkan tazedgi i iwaliwen d tebratin nna zuzzurnt tirra i ugdud.

Ɛumar Ayt Sɛid, anaẓur, Asif-N-Dads, 2974