ⵜⵉⵖⵔⵉ ⴳ ⵓⴷⵍⵉⵙ ” ⵜⵉⵎⵎⵓⵖⵔⴰ ⵏ ⵜⵎⵖⴰⵔⵜ ” ⵏ ⵄⵓⵎⴰⵔ ⴰⵢⵜ ⵙⵄⵉⴷ / RACHID AIT AMEUR

ⵜⵉⵖⵔⵉ ⴳ ⵡⴰⵎⵓⴷ ⵏ ⵜⵓⵍⵍⵉⵙⵉⵏ ⵏ ⵓⵎⵢⴰⵔⵓ ⴷ ⵓⵎⵔⵣⵓ ⴷ ⵓⵙⵍⵎⴰⴷ ⵄⵓⵎⴰⵔ ⴰⵢⵜ ⵙⵄⵉⴷ :
ⵜⵓⵙⵙⵏⵉⵡⵉⵏ ⵅⴼ ⵓⵎⵢⴰⵔⵓ :
ⵄⵓⵎⴰⵔ ⴰⵢⵜ ⵙⵄⵉⴷ, ⵉⴳⴰ ⴰⵙⵍⵎⴰⴷ ⵉⵜⵜⵡⴰⵙⵙⵏ ⴳ ⴽⵉⴳⴰⵏ ⵏ ⵢⵉⴳⵔⴰⵏ ⴰⵎ : ⵜⴰⵥⵓⵕⵉ, ⵜⵉⵔⵔⴰ, ⵉⴳ ⵓⵍⴰ ⴰⵎⵔⵣⵓ ⴳ ⵜⵙⴽⵍⴰ ⴷ ⵜⵙⵏⵉⵍⵙⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⵉⵜⵜⵡⴰⵙⵙⵏ ⵙ ⵜⵣⵍⴰⵜⵉⵏ ⵜⵉⵙⴳⵎⴰⵏⵉⵏ ⴷ ⵜⵣⵍⴰⵜⵉⵏ ⵏ ⵜⴰⴹⴼⵉ ⴳ ⵓⵙⴰⵎⵎⵔ, ⴷ ⵡⵓⵏⵓⵖ ⵏⵏⵙ ⵅⴼ ⵜⵖⵔⵎⴰⵜⵉⵏ ⵙ ⵜⵓⵥⵍⴰⵢⵜ ⴷ ⵎⴰⵢⴷ ⴰⴽⴽⵯ ⵉⵣⴷⵉⵏ ⴷ ⵜⴰⵢⵙⵉ ⵙ ⵓⵎⴰⵜⴰ.
ⵜⵓⵙⵙⵏⵉⵡⵉⵏ ⵡⴼ ⵓⴷⵍⵉⵙ :
ⵜⵉⴽⴽⵍⵜ ⴰ, ⵢⵉⵡⵉ ⴰⵖ ⴷ ⵢⴰⵜ ⵜⵔⵣⵣⵉⴼⵜ ⵜⴰⵎⴰⵢⵏⵓⵜ ⴳ ⵢⵉⴳⵔ ⵏ ⵜⵙⴽⵍⴰ, ⵢⵉⵡⵉ ⴰⵖ ⵢⴰⵏ ⵡⴰⵎⵓⴷ ⵏ ⵜⵓⵍⵍⵉⵙⵉⵏ ⵉⴳⴰⵏ ⴷⴷⴰⵡ ⵓⵣⵡⵍ « ⵜⵉⵎⵎⵓⵖⵔⴰ ⵏ ⵜⵎⵖⴰⵔⵜ ». ⵉⵙⴽⵔ ⴰⵙ ⵓⵙⵍⵎⴰⴷ ⴷ ⵓⵎⴷⵢⴰⵣ ⴷ ⵓⵎⵢⴰⵔⵓ ⵎⴰⵙⵙ ⵄⵓⵎⴰⵔ ⴷⵔⵡⵉⵛ ⵜⴰⵣⵡⴰⵔⵜ, ⵉⵙⴽⵔ ⴰⵙ ⵓⵎⵔⵣⵓ ⴷ ⵓⵙⵍⵎⴰⴷ ⵎⴰⵙⵙ ⵃⴰⵎⵉⴷ ⵟⴰⵍⵉⴱⵉ « ⴰⵡⴰⵍ ⴷ ⵉⵏⵉⴳⵉ », ⵉⵣⵣⵔⵉ ⴰⵙ ⵅⴼ ⵜⵓⵜⵍⴰⵢⵜ ⵓⵙⵍⵎⴰⴷ ⴷ ⵓⵎⵔⵣⵓ ⵎⴰⵙⵙ ⵄⴱⴷⵍⵄⴰⵍⵉ ⴰⵢⵜ ⵄⴷⴷⵉ. ⵉⴳ ⴰⵙ ⵓⵏⴰⵥⵓⵕ ⴷ ⵓⵙⵍⵎⴰⴷ ⴷ ⵓⵎⵢⴰⵔⵓ ⵎⴰⵙⵙ ⵎⵓⵃⴰ ⵎⵍⵍⴰⵍ ⵜⴰⵡⵍⴰⴼⵜ ⵉ ⵜⵖⵎⵙⴰ.
ⴰⴷⵍⵉⵙ ⴰ, ⵢⵓⵎⴰ ⴽⵉⴳⴰⵏ ⵏ ⵜⵓⵍⵍⵉⵙⵉⵏ (11 ⵏ ⵜⵓⵍⵍⵉⵙⵜ), ⴱⴹⴰⵏⵜ ⵅⴼ 123 ⵏ ⵜⴰⵙⵏⴰ, ⵉⵙⵙⵎⵔⵙ ⵓⵎⵢⴰⵔⵓ ⴰⵙⴽⴽⵉⵍ ⴰⵍⴰⵜⵉⵏⵉ. ⴰⵣⵡⵍ ⵏ ⵓⴷⵍⵉⵙ ⵢⵓⵙⵢ ⴰⵣⵡⵍ ⵏ ⵜⵓⵍⵍⵉⵙⵜ ⵉⵖⵣⵣⵉⴼⵏ ⴰⴽⴽⵯ ⴷ ⵓⴷⵍⵉⵙ ⵏⵏⴰ ⵉⵙⴰⵡⴰⵍⵏ ⵅⴼ ⵢⴰⵜ ⵜⵔⴱⴰⵜ (ⵜⴰⵃⵛⵎⵉⵢⵜ, ⵜⴰⵃⵏⵊⵉⵔⵜ, ⵜⴰⴼⵔⵓⵅⵜ,…) ⵉⴳⴰⵏ ⵣⵣⵉⵏ ⴰⵎ ⵜⴰⴼⵓⴽⵜ, ⴷⴰ ⵜⴽⵙⵙⴰ ⵜⴰⵎⴰ ⵏ ⵡⴰⵙⵉⴼ ⴷ ⵉⴷⵓⵔⴰⵔ ⴽⵓ ⴰⵙⵙ, ⴰⵔ ⵜⵜⵉⵔⵉⵔ ⵉⵣⵍⴰⵏ, ⴽⵓⴷ ⵜⵜⵉⵔⵉⵔ, ⵜⴽⵜⵜⵉ ⴷ ⵓⵙⵙⴰⵏ ⵉⴳⴰⵏ ⴰⴽⴽⵯ ⵜⵓⵎⵔⵜ ⴷ ⵓⵎⴷⴰⵣ, ⵜⴽⵜⵉ ⴷ ⵓⵍⴰ ⵉⴷⵉⵔ ⵏⵏⴰ ⵉⴳⴰⵏ ⵢⴰⵏ ⵓⴼⴷⴷⴰⵎ ⵉⴳⴰⵏ ⵣⵣⵉⵏ, ⵉⴳ ⴰⵎⴷⵢⴰⵣ ⵉⵜⵜⴱⴱⵉⵏ ⴰⵡⴰⵍ ⵅⴼ ⵄⵉⵛⴰ, ⵜⴽⵜⵉ ⴷ ⵓⵍⴰ ⴰⵙⵙ ⵏⵏⴰ ⴳ ⴱⴹⴰⵏ ⴳ ⵉⵔⴰ ⵢⵉⴷⵉⵔ ⴰⴷ ⵉⵎⵎⵓⴷⴷⵓ ⵙ ⵜⵎⵉⵣⴰⵔ ⵏ ⴱⵕⵕⴰ, ⵉⵙⵙⵓⵜⵔ ⴳ ⵄⵉⵛⴰ ⴰⴷ ⵜⵜⵇⵇⵍ ⴰⴱⴷⴰ ⵥⴰⵕⵚ ⴰⵔ ⴷ ⵢⵓⵖⵓⵍ, ⵜⵓⴽⵉ ⴷ ⵄⵉⵛⴰ ⴳ ⵜⵡⴰⵔⴳⵉⵜ ⵏⵏⵙ ⵜⴰⴼ ⴷ ⵓⵍⵍⵉ ⵏⵉⵏⵜ ⴰⴽⴽⵯ ⴰⵍⵎⵓ, ⵜⵙⵎⵓⵏ ⵜⵏⵜ, ⵜⴷⴷⵓ ⵙ ⵜⴰⴷⴷⴰⵔⵜ, ⵢⵉⵏⵉ ⴰⵙ ⴱⴱⴰ ⵏⵏⵙ ⵢⴰⵏ ⵡⴰⵡⴰⵍ ⵉⴱⴱⵉⵏ ⵓⵍ ⵏⵏⵙ, ⴰⵡⴰⵍ ⵓⵔ ⵉⴳⵉⵏ ⴰⵎ ⵡⴰⵡⴰⵍ, ⵉⵏⵏⴰ ⴰⵙ : ⵉⵔⴰ ⴽⵎ ⵢⵉⵡⵙ ⵏ ⵓⵎⵖⴰⵔ ⵉ ⵍⵉⵜⵉⵀⴰⵍ, ⵉⴱⴱⵉ ⵏⵏ ⵡⴰⵡⴰⵍ ⴳ ⵄⵉⵛⴰ.
ⵉⵣⵔⵉ ⵢⴰⵏ ⵡⴰⵙⵙ ⵜⵔⴰⵔ ⴰⵙ ⵄⵉⵛⴰ ⵉ ⴱⴱⴰ ⵏⵏⵙ : ⵉⵙ ⵓⵔ ⵜⴰ ⵜⵔⵉ ⴰⴷ ⵜⴰⵡⵍ, ⵉⵔⴰⵔ ⴰⵙ ⴷ ⴱⴱⴰ ⵏⵏⵙ ⵙ ⵡⴰⵡⴰⵎ ⵉⵕⵥⴰⴳⵏ : ⵏⴽⴽⵯⵏⵉ ⴰⵢ ⵉⵙⵙⵏⵏ ⵎⴰⴳ ⵉⵍⵍⴰ ⵓⴼⵓⵍⴽⵉ ⵏⵏⵎ. ⵄⵉⵛⴰ ⵓⵔ ⵜⵜ ⵉⵙⵙⵓⵙⵉⵎ ⵡⴰⵡⴰⵍ ⴰ, ⵜⴰⵙⵢ ⵜⴰⵡⵍⴰⴼⵜ ⵏ ⵓⵙⵎⵓⵏ ⵏⵏⵙ ⴰⵔ ⵜⴰⵍⵍⴰ ⵉⵎⵟⵟⴰⵡⵏ ⵉⵕⵥⴰⴳⵏ, ⴰⵔ ⵜⴰⴽⴽⴰ ⵉⵙⵇⵙⵉⵜⵏ ⵉ ⵜⵡⵏⴳⵉⵎⵜ ⵏⵏⵙ ⵅⴼ ⵎⴰⵢⴷ ⴰⵙ ⵉⵙⴰⵔⵏ, ⵜⵔⴰ ⵜⴰⵢⵔⵉ ⵏⵏⵙ ⴰⴷ ⵜⴷⴷⵔ, ⵜⵔⴰ ⴰⵡⴰⵍ ⵏⵏⵙ ⴰⴷ ⵉⴷⴷⵔ, ⵜⵔⴰ ⵉⵣⵔⴼⴰⵏ ⵏⵏⵙ, ⵓⵔ ⵜⴳⵉ ⴰⵎ ⵜⵉⵍⵉ, ⵜⵔⴰ ⴰⴷ ⵜⴷⴷⵔ ⴷ ⵜⵍⴻⵍⵍⵉⵢⵜ,…
ⵜⵙⵡⵉⵏⴳⵎ ⴰⴷ ⵜⴼⴼⵖ ⵜⴰⵎⴰⵣⵉⵔⵜ, ⵣⵉⴽ ⵜⴼⴼⵖ, ⵜⴽ ⵉ ⵉⴱⵔⴷⴰⵏ ⴰⵍⵍⵉⴳ ⵏⵏ ⵜⵉⵡⴹ ⵢⴰⵏ ⵢⵉⵖⵔⵎ, ⵜⵙⴽⵔ ⴷⴰⵔ ⵓⵃⴼⴼⴰⴼ, ⵜⴽⴽⵙ ⴰⵣⵣⴰⵔ ⵡⴰⵅⵅⴰ ⴰⵙ ⵉⵃⵍⴰ, ⵜⵍⵙ ⵜⴰⵊⵍⵍⴰⴱⵉⵜ ⴷ ⵓⵔⵣⵣⵓⵢ, ⴰⵔ ⵜⵜⴻⵜⵜⵔ ⵜⴰⵡⵓⵔⵉ, ⵜⵥⵥⵉⴹⵕ ⵉ ⵜⵎⴰⵔⴰ, ⴰⵡⵜⵜⴰⵙ ⵏⵏⵙ ⴰⴷ ⴷ ⵜⵔⴰⵔ ⵓⴷⴷⵓⵔ ⵉ ⵜⵎⵖⴰⵔⵜ.
ⵜⴷⴷⵓ ⵄⵉⵛⴰ ⵏⵏⴰ ⵢⴰⵖⵓⵍⵏ ⵜⴳⴰ ⵎⵓⵃⴰ ⵙ ⵢⴰⵜ ⵜⴰⴷⴷⴰⵔⵜ ⵜⴰⵅⴰⵜⴰⵔⵜ, ⵜⵙⵇⵉⴱⴱ ⴰⵙ, ⵜⴼⴼⵖ ⴷ ⵢⴰⵜ ⵜⵎⵟⵟⵓⴹⵜ, ⵜⵙⵖⴰⵡⵙⴰ ⵏⵉⵜ ⵙ ⵎⴰⵢⴷ ⵉⵙⵡⵓⵔⵉⵏ ⴳ ⵜⵡⵓⵔⵉⵡⵉⵏ ⵏ ⵜⴰⴷⴷⴰⵔⵜ ⴷ ⵢⵉⴳⵔⴰⵏ.
ⵉⵎⴰⵔⴰⵡⵏ ⵏ ⵄⵉⵛⴰ ⵓⵔ ⵓⴷⵊⵉⵏ ⵎⴰⵜⵜⴰ ⵓⴷⵖⴰⵔ ⵉⵍⵍⴰⵏ ⵓⵔ ⵜ ⴽⴽⵉⵏ, ⵄⵉⵛⴰ ⵜⵣⵍⴰ. ⵄⵉⵛⴰ ⵏⵜⵜⴰⵜ, ⵜⵎⵢⴰⵔ ⴰⴷⴷⴰⴷ ⴰⵎⴰⵢⵏⵓ ⵏⵏⵙ, ⵜⵥⵥⵉⴹⵕ ⵉ ⵜⵎⴰⵔⴰ.
ⵢⴰⵏ ⵡⴰⵙⵙ ⴳ ⵡⵓⵙⵙⴰⵏ, ⵜⴽⵛⵎ ⴰⴷ ⵜⵙⵙⵉⵔⴷ ⵜⴰⴼⴽⴽⴰ ⵏⵏⵙ. ⵜⴰⵙⵢ ⵜⵎⵖⴰⵔⵜ ⵉⵃⵔⵓⵢⵏ ⴰⴷ ⵜⵏ ⵜⵙⵙⵉⵔⴷ, ⵜⴰⴼ ⵏⵏ ⵉⴷⴰⵎⵎⵏ ⴳ ⵜⵎⵍⵙⴰ ⵏⵏⵙ, ⵜⵖⴰⵍ ⵉⵙ ⵢⵓⴹⵏ ⵎⵓⵃⴰ, ⵎⴰⵛⴰ ⵀⴰⵜ ⵉⴷⴰⵎⵎⵏ ⵏ ⵜⴳⵉⵔⴰ ⵏ ⵡⴰⵢⵢⵓⵔ. ⴰⵙⴽⴽⴰ ⵏⵏⵙ, ⵜⴰⵡⵉ ⵜⵎⵟⵟⵓⴹⵜ ⵎⵓⵃⴰ (ⵄⵉⵛⴰ) ⵙ ⴷⴰⵔ ⵓⵎⵙⵙⴰⵙⴼⵔ, ⴷⴷⴰ ⴳ ⵏⵏ ⵉⵡⴹⵏ ⴰⵙⴳⵏⴰⴼ, ⵜⴰⵍⵙ ⴰⵙ ⵄⵉⵛⴰ ⵜⴰⵍⵍⴰⵙⵜ ⵏⵏⵙ ⵉ ⵓⵎⵙⵙⴰⵙⴼⵔ, ⵜⵙⵙⵓⵙⵎ ⵜⵜ ⵅⴼ ⵓⵥⵥⵉⴹⵕ ⵏⵏⵙ ⵉⴷⴷⵖ ⵜⵓⵙⵢ ⴰⵛⵏⵢⴰⵍ ⵏ ⵜⴰⵢⵔⵉ ⵙ ⴰⴼⵍⵍⴰ, ⵡⴰⵅⵅⴰ ⵍⵍⴰⵏⵜ ⵜⴱⴱⴰⵢⴹⴰⵕⵉⵏ ⵏ ⵡⴰⵎⵓⵏ.
ⴷⴷⴰ ⴳ ⵖⵓⵔⵙ ⴰⴽⵓⴷ ⵢⵓⵔⴰⵏ, ⵉⵎⵓⵏ ⵓⵎⵙⵙⴰⵙⴼⵔ ⴷ ⵄⵉⵛⴰ ⵙ ⵖⵓⵔ ⵜⵎⵟⵟⵓⴹⵜ, ⴰⵍⵙⵏ ⴰⵙ ⵎⴰⵢⴷ ⴰⵙ ⵉⵙⴰⵔⵏ, ⵜⴻⵜⵜⵔ ⴰⵙ ⴰⵙⵙⵓⵔⴼ ⵅⴼ ⵜⵡⵓⵔⵉⵡⵉⵏ ⵉⵛⵇⵇⴰⵏ ⵏⵏⴰ ⴳ ⵜⵙⵡⵓⵔⵉ ⵖⵓⵔⵙ.
ⵜⵎⵓⵏ ⴰⴽⵉⴷⵙ ⵜⵎⵖⴰⵔⵜ ⴰ, ⴰⴼⴰⴷ ⴰⴷ ⴰⵡⵙⵏ ⵉ ⵄⵉⵛⴰ ⵏⵏⴰ ⵉⴽⴰⵏ ⵓⴷⴷⵓⵔ ⵉ ⵜⴰⵢⵔⵉ. ⴷⴷⴰ ⴳ ⵏⵏ ⵉⵡⴹⵏ ⵉⵖⵔⵎ ⵏⵏⵙ, ⵓⴼⴰⵏ ⵏⵏ ⵢⴰⵜ ⵜⵎⵖⵔⴰ ⴳ ⵢⴰⵜ ⵜⴰⴷⴷⴰⵔⵜ ⵜⴰⵅⴰⵜⴰⵔⵜ, ⵜⵙⵇⵙⴰ ⵢⴰⵏ ⵓⴼⴷⴷⴰⵎ ⵅⴼ ⵡⴰⴷⴷⴰ ⴰⵙ ⵉⵙⵙⵎⵔⴰⵏ, ⵉⵏⵏⴰ ⴰⵙ ⵉⴷⵉⵔ, ⵓⵔ ⵜⵜ ⵢⴰⴷ ⵓⵙⵉⵏ ⵉⴹⴰⵕⵏ ⵏⵏⵙ, ⵉⴼⴼⵖ ⴷ ⵢⵉⴷⵉⵔ ⴰⵍⵙⵏ ⴰⵙ ⵎⴰⵢⴷ ⵉⵙⴰⵔⵏ ⵉ ⵄⵉⵛⴰ, ⵉⴱⴷⵓ ⴰⵔ ⵢⴰⵍⵍⴰ, ⵉⵎⵓⵏ ⴷⵉⴷⵙ ⵙ ⵖⵓⵔ ⵉⵎⴰⵔⴰⵡⵏ ⵏⵏⵙⵏ, ⴷⴷⴰ ⴳ ⵏⵏ ⴳⵓⵍⴰⵏ ⵜⴰⴷⴷⴰⵔⵜ ⵏⵏⵙ, ⴼⴼⵖⵏ ⴷ ⵉⵎⴰⵔⴰⵡⵏ ⵏⵏⵙ ⴰⵔ ⴰⵍⵍⴰⵏ, ⵜⵜⵔⵏ ⴰⵙ ⴰⵙⵙⵓⵔⴼ, ⵢⵉⵏ ⴰⵙ ⵢⵉⴷⵉⵔ : ⴰⴷ ⵔⵓⵍⵏ ⵏⵜⵜⴰ ⴷ ⵄⵉⵛⴰ, ⵎⴰⵛⴰ ⵉⵏⵏⴰ ⴰⵙⵏ ⵓⵎⵙⵙⴰⵙⴼⵔ : ⵢⵓⴷⴰ ⴳ ⵜⵔⵓⵍⵉⵡⵉⵏ, ⴷⴷⵓⵏ ⵙ ⴷⴰⵔ ⵎⴷⴷⵏ ⵉⵍⵍⴰⵏ ⴳ ⵓⵔⵏⵔⴰⵔ ⵏ ⵓⵃⵉⴷⵓⵙ, ⵔⴰⵏ ⴰⴷ ⴰⵙⵏ ⵙⵙⴼⵔⵓⵏ ⵜⴰⵍⵍⴰⵙⵜ ⵏ ⵄⵉⵛⴰ ⵉⴳⴰⵏ ⵜⵉⵏⵎⵍ ⵏ ⵓⵙⵍⵎⴷ ⵏ ⵜⴰⵢⵔⵉ, ⵜⵓⴽⵍⴰⵍ ⴰⴷ ⴰⵙ ⵉⵙⵙⴼⵍⴷ ⵓⵎⵥⵥⴰⵏ ⴷ ⵓⵅⴰⵜⴰⵔ.
ⴰⴽⵓⴷ ⵏⵏⴰ ⵙⵙⴼⵍⴷⵏ ⵎⴷⴷⵏ ⵉ ⵎⴰⵢⴷ ⵉⵙⴰⵔⵏ ⵉ ⵄⵉⵛⴰ, ⴳⵔⵏ ⵜⵉⵖⵔⴰⵜⵉⵏ, ⵜⴰⵎⵟⵟⵓⴹⵜ ⵏⵏⴰ ⴷ ⵢⵉⵡⵉ ⵢⵉⴷⵉⵔ ⵉⴹ ⴰ, ⵜⵜⵔⵏ ⴰⵙ ⵉⵎⴰⵔⴰⵡⴰⵏ ⵏⵏⵙ ⴰⵙⵙⵓⵔⴼ ⴰⵛⴽⵓ « ⴰⵙⴳⵎⵉ ⵡⵉⵏ ⴱⴱⴰ ⴷ ⵎⵎⴰ, ⵜⴰⵢⵔⵉ ⵜⵉⵏ ⵡⵓⵍⴰⵡⵏ, ⵜⴰⵢⵔⵉ ⵓⵔ ⵜⵔⵉ ⴰⵍⴳⴰⵎⵓ, ⵓⵍⴰ ⵜⵔⴰ ⵉⵖⵏⴰⵏ », ⴰⴷ ⵏⵏⴰ ⵉⵎⴰⵔⴰⵡⵏ ⵏ ⵜⵎⵟⵟⵓⴹⵜ ⴰ.
ⵣⵔⵉⵏ ⵙⵉⵏ ⵉⵙⴳⴳⵯⴰⵙⵏ, ⵢⴰⵔⵓ ⵢⵉⴷⵉⵔ ⴷ ⵄⵉⵛⴰ ⵢⴰⵏ ⵓⵔⴱⴰ ⵏ ⵜⴰⵢⵔⵉ, ⴳⵏ ⴰⵙ ⵉⵙⵎ ⴰⵎⴰⵣⵉⵖ, ⴷⴷⵔⵏ ⴳ ⵓⵎⴷⴰⵣ ⴷ ⵜⵓⵎⵔⵜ,…
ⴰⵎⴰⵢⵏⵓ ⴳ ⵓⴷⵍⵉⵙ ⴰ, ⵜⴷⴷⴰ ⴰⵙ ⴷ ⵜⵡⵏⴳⵉⵎⵜ ⵅⴼ ⵡⵓⴷⴷⵓⵔ ⵏ ⵜⵎⵖⴰⵔⵜ. ⵉⴽⴰ ⵓⴷⴷⵓⵔ ⵉ ⵜⵎⵖⴰⵔⵜ ⵏⵏⴰ ⵢⵓⴽⵍⴰⵍⵏ ⵓⴳⴳⴰⵔ. ⵜⴰⵎⵟⵟⵓⴹⵜ ⵜⵓⴽⵍⴰⵍ ⴰⴷ ⵜⴷⴷⵔ ⴷ ⵜⵍⴻⵍⵍⵉⵢⵜ, ⵜⵓⴽⵍⴰⵍ ⴰⴷ ⵜⴰⵎⵥ ⵉⵣⵔⴼⴰⵏ ⵏⵏⵙ, ⵜⵓⴽⵍⴰⵍ ⴰⴷ ⵢⵉⵍⵉ ⵡⴰⵡⴰⵍ ⵏⵏⵙ, ⵏⵜⵜⴰⵜ ⴰⵢⴷ ⵉⴳⴰⵏ ⵜⵉⵔⵙⴰⵍ ⵏ ⵡⴰⵎⵓⵏ, ⵏⵜⵜⴰⵜ ⴰⵢⴷ ⵉⵟⵟⴰⴼⵏ ⴰⵡⴰⵍ ⴷ ⵜⵓⵜⵍⴰⵢⵜ ⵏⵏⵙ, ⵏⵜⵜⴰⵜ ⴰⵢⴷ ⴰⵖ ⵉⵙⵙⴳⵎⴰⵏ ⴰⵡⴰⵍ ⴷ ⵜⴰⵢⵙⵉ ⴷ ⵜⴷⵍⵙⴰ ⴷ ⵜⵓⵙⵙⵏⴰ ⵏⵏⵖ. ⴰⴷⵍⵉⵙ ⴰ, ⴷ ⵜⵡⵏⴳⵉⵎⵜ ⵢⴰⴽⴽⴰⵏ ⵓⴷⴷⵓⵔ ⴷ ⵡⴰⵜⵉⴳ ⵉ ⵜⵎⵟⵟⵓⴹⵜ.
ⴰⵢⵏⵏⴰⵖ ⴰⵢⴷ ⵢⵓⴷⵊⴰⵏ ⵄⵉⵛⴰ ⴰⴷ ⵜⴼⴼⵖ ⵉⵖⵔⵎ ⵏⵏⵙ, ⵜⵣⵔⵉ ⵉⵎⴰⵔⴰⵡⴰⵏ ⵏⵏⵙ, ⵜⵣⵔⵉ ⵎⴰⵢⴷ ⴰⴽⴽⵯ ⵖⵓⵔⵙ ⵉⵃⵍⴰⵏ ⴰⴼⴰⴷ ⴰⴷ ⵜⵔⴰⵔ ⵓⴷⴷⵓⵔ ⵉ ⵜⵎⵖⴰⵔⵜ, ⵜⵔⴰⵔ ⴷ ⵉⵣⵔⴼⴰⵏ ⵏⵏⴰ ⵓⵔ ⵜⵓⵎⵉⵥ, ⵖⵓⵔⵙ ⴰⵡⴷ ⵏⵜⵜⴰⵜ ⴰⵣⵔⴼ ⴳ ⵜⴰⵢⵔⵉ, ⵓⵔ ⵜⵔⵉ ⴰⴷ ⵜⴳ ⴰⵎ ⵜⵉⵍⵉ. ⵜⴽⴽⴰ ⴰⴱⵔⵉⴷ ⵏ ⵜⵖⵏⵙⴰ, ⴰⴱⵔⵉⴷ ⵏ ⴷⵉⵀⵉⵢⴰ, ⴰⴱⵔⵉⴷ ⵏ ⵄⴷⵊⵓ ⵎⵓⵃ, ⴰⴱⵔⵉⴷ ⵏ ⵜⵉⵏⵀⵉⵏⴰⵏ,…
ⵢⵓⵎⴰ ⵓⴷⵍⵉⵙ ⴰ, ⴽⵉⴳⴰⵏ ⵏ ⵜⵓⵍⵍⵉⵙⵉⵏ ⵢⴰⴹⵏⵉⵏ ⵣⵓⵏ ⴷ :
 ⵉⵎⵄⵙⵉ ⵏ ⵎⴰⵢⵙ.
 ⵜⴰⴼⵓⴽⵜ, ⵉⵚⵉⴹ ⵏ ⵜⴰⵢⵔⵉ.
 ⴱⴰⵇⵛⵉⵛ.
 ⴰⵎⴰⴹⴰⵍ ⵉⴳⴰⵏ ⴰⵅⴰⵎ ⵉⵏⵓ.
ⵙ ⵎⴰⵢⴷ ⵉⵥⵍⵉⵏ ⵙ ⵜⵓⵜⵍⴰⵢⵜ, ⵉⵙⵎⵔⵙ ⵓⵎⵢⴰⵔⵓ ⵢⴰⵜ ⵜⵓⵜⵍⴰⵢⵜ ⵉⴼⵙⵙⵓⵙⵏ, ⵉⵜⵜⵡⴰⵔⵎⴰⵙⵏ, ⴰⴷ ⵜⵜ ⵉⵖⵔ ⴽⵓ ⵢⴰⵏ (ⵜ). ⵉⵙⵎⵔⵙ ⴰⵎⴰⵡⴰⵍ ⴰⵣⴰⵢⴽⵓ ⴷ ⵓⵎⴰⵢⵏⵓ.
ⴰⴷⵍⵉⵙ ⴰ, ⵢⵓⴽⵍⴰⵍ ⵜⵉⵖⵔⵉ, ⴰⵢⵢⵓⵣ ⵉ ⵎⴰⵙⵙ ⵄⵓⵎⴰⵔ ⴰⵢⵜ ⵙⵄⵉⴷ, ⵓⵍⴰ ⵎⴰⵢⴷ ⴰⴽⴽⵯ ⵢⵉⵡⵙⵏ ⴳ ⵜⵡⵓⵔⵉ ⴰ ⴰⴼⴰⴷ ⴰⴷ ⴷ ⵜⴼⴼⵖ ⵙ ⵜⵉⵍⴰⵡⵜ. ⴰⵔ ⴰⴽ ⵏⵙⵙⵉⵔⵉⵎ ⴰ ⵎⴰⵙⵙ ⵄⵓⵎⴰⵔ ⵉⵎⴰⵍ ⵉⴳⴰⵏ ⴰⴽⴽⵯ ⴰⵎⵓⵔⵙ, ⵉⴳ ⴰⴽⴽⵯ ⴰⵙⵏⴼⵍⵓⵍ, ⴷ ⵜⴰⵖⵣⵉ ⵏ ⵜⵓⴷⵔⵜ.
ⵓⴷⴷⵓⵔ ⵉ ⵜⵎⵖⴰⵔⵜ ⴰⵏⴷⴰ ⵜⵍⵍⴰ.
ⵕⴰⵛⵉⴷ ⴰⵢⵜ ⵄⵎⵔⵓ.
RACHID AIT AMEUR.